Fidirazione di l'Associi di Quatrigliu è altri Balli Pupulari corsi
Fédération des associations de quadrille et autres danses populaires corses
Federation of associations for squares and other popular dances of Còrsica

"Tutti in Piazza !" hè à u listessu tempu un invitu à a ghjente à ch'ella s'accoglii in piazza à u paese pà u ballu, è una chjama fatta à i balladori par ch'elli si piàzzinu à nantu à a pista ballatoghja. È cusì fù chjamatu l'associu dill' amichi chì si ritruvàvanu tutte e sittimane à l'attelli di a Casa di a Cultura di a Còrsica, à a fine di u 70.
Avìanu in cumunu a passione di vulè ritruvà i passi è e figure di u vechju quatrigliu di Sermanu induv'ì Minicale avìa amparatu à sunà quatriglii, polcà, mazurche, scultisce e valsi cù Filice Antone Guelfucci.
Ci era frà tutti a vulintà di salvà u patrimoniu musicale di a Còrsica, ma sopra à tuttu a primmura di salvanne u spìritu, ssu spìritu paisanu chì parechji avìanu cunnisciutu, un pocu diffìciule à spiigà, è chì pudarìa esse u piacè di fà festa in trà di ghjente sèmplice è suciale, a lingua d'ind'è noi chì sunava cum'è una mùsica è ch' à mumenti l'emu da circà, sse stonde di gioia chì i vechji cuntàvanu cusì vulinteri.

Vinti anni dopu, Tutti in Piazza hè divintatu una fidirazione.
U so scopu hè di sviluppà u ballu pupulare corsu, quatrigliu è altri balli, cù un' urganisazione d'insignamentu, di prumuzione è di diffusione in tutta a Còrsica,
Ad avà parechji associ si sò fidirati, ciò chì face più di un centu di parsone. Parechji paesi dummàndanu l'aiutu di a fidirazione par avè u so attellu di ballu. Igni locu e scole di u primmariu àprenu e porte à u quatrigliu ch' hà avutu un bellu successu cù i zitelli. È po, ch'ella sìa pà e feste di paesi, un' accasione o quill' altra, Tutti in Piazza s'hè trovu prisente in parechje animazione, è tutte e volte hà datu a prova chì a ghjente piglia un grande piacè à amparà u quatrigliu.

 

U scopu di Tutti in Piazza
Fà cunnosce è apprizià u quatrigliu in tutta a Còrsica, fà ch'ellu porti sempre u spìritu di i nostri lochi, a lingua d' ind' è noi rispittata in tutti i so parlati, u piacè di ritruvassi, u piacè di a festa è di a sucietà,sicondu ciò ch' ellu brama u core d' ogni Corsu.




Contact